Археолог: "Көмүлгөн мумияны кайра казып тез арада ордуна коюлушун талап кылабыз"

Кыргыз археологдору жана тарыхчылары 1956-жылы Баткен облусунун Кара-Булак айылында табылып Тарых музейде сакталып турган мумиянын жерге берилишине нааразычылыгын айтышты. Бул тууралуу бүгүн, 17-октябрда Илимдер академиясынын тарых институтунун директорунун орун басары Кадича Ташбаева маалымат жыйынында билдирди.

"Биз көптөгөн мээнеттер менен мына ушундай тарыхтын издерин издеп мумияларды табабыз. Мына ушул Улуттук музейде сакталып турган аялдын мумиясы - бул биздин өлкөбүздөгү жакшы абалда сакталган жалгыз мумия болчу. Аталган мумия жаткан жерге суу жана аба кирбей жакшы сакталган. Аны изилдөө менен жашын аныктоого мүмкүн эле. Анын кийген кийимдери да жакшы сакталган. Анын кийимдеринде Кытайда тигилген жибектер бар эле. Аны изилдешибиз керек болчу. Ошондой эле анын ДНКсын изилдеп ошол учурдагы ооруларды аныктасак болмок. Ал эми биздин маданият министрибиз, атайын комиссия 10 мүнөттө жерге берүү чечимин кабыл алышты. Комиссия мумиянын салмагына, анын археологиялык баалуулугуна баа бербей туруп добуш беришти. Алардын арасында археологдордон мен жалгыз эле болдум", - деди Кадича Ташбаева.

Ошондой эле жыйындын катышуучулары мумияны көмүүгө демилгечи болгондорду вандализмге күнөөлөштү.