Дайыр Кенекеев, Өкмөттүн Талас облусундагы өкүлү: "Митинг өткөрүүгө негиз жок"

Бүгүн, 17-октябрда Өкмөттүн Талас облусундагы өкүлү Дайыр Кенекеев митинг өткөрүүгө негиз жок деген оюн айтты.

"Таласта митингге чыккандардын артында кимдир бирөө бар. Кечээ чогулгандарга тамак, спирт ичимдиги таратылып жатты. Митингге 3-4 миң киши чыкты дегени калп. Жалпы 600-700 киши чогулду. Мен чыгып алар менен жолугуп, түшүндүрүү иштерин жүргүзгөн соң чогулгандардын 500дөйү тарап кетти. 200гө жакын адам гана туруктуу турду", - деди ал.

Эске салсак, кечээ Талас шаарында Өмүрбек Бабановдун 3 миңдей тарапташтары чогулуп митинг өткөрүшкөн. Митингчилер шайлоонун жыйынтыгына нааразы болушуп "административдик ресурс пайдаланылган. Шайлоо таза өткөн жок", - деп чыгышкан. Алар менен Өкмөттүн Талас облусундагы өкүлү жолугуп, сүйлөшкөн. Эл саат 20:30дар чамасында тарап, митинг 17-октябрда уланарын айтышкан эле.