Чемпиондор Лигасы, 3-тур: Бүгүн "Реал Мадрид" өз талаасында "Тоттенхэмди" кабыл алса, "Севилья" конокто "Спартак" менен кез келет

Бүгүн, 17-октябрдан 18-октябрга караган түнү Европадагы эң ири футболдук лига - Чемпиондор Лигасынын тайпалык баскычында 3-турдун оюндары ойнолот. Бул күнү 4 тайпадагы командалар өз ара беттешет.

Күндүн башкы беттеши катары "Реал Мадрид" - "Тоттенхэм" жана “Спартак” - “Севилья” клубдарынын ортосундагы оюндарды саноого болот.

"Е" тайпасында 2 турдун жыйынтыгында "Севилья" командасы 4 упай менен 1-орунда турат. 2-орунда 2 упай менен "Ливерпуль" жана "Спартак" командалары жайгашса, 4-орунда 1 упай менен "Марибор" командасы жайгашууда.

"F" тайпасында 2 турдун жыйынтыгында "Манчестер Сити" командасы 2 беттеште тең жеңишке жетип 6 упай менен 1-орунда келүүдө. 2-3-орунда 3 упайдан топтогон "Шахтёр Донецк" жана "Наполи" командалары орун алууда. Ал эми 4-орунда упайсыз "Фейеноорд" командасы жайгашкан.

"G" тайпасында 2 турдун жыйынтыгында атаандаштарын жеңип алган "Бешикташ" командасы 6 упай менен 1-орунда. 2-орунда 3 упайга ээ болгон "Порту" командасы келе жатат. 3-4-орунда 1 упайдан ээлеген "Монако" жана "РБ Лейпциг" командалары орун алууда.

"H" тайпасында 2 турдун жыйынтыгында 6 упайга ээ "Реал Мадрид" жана "Тоттенхэм" командалары 1-орунду талашып келе жатышат. Ал эми "Боруссия Дортмунд" менен "АПОЭЛ" командалары 0 упай менен 3-4-орунду бөлүшүп келүүдө.

Бардык беттештерге Бишкек убактысы боюнча саат 00:45те старт берилет.

"Е" тайпасы:

"Спартак" (Москва) - "Севилья" (Испания);

"Марибор" (Словения) - "Ливерпуль" (Англия).

"F" тайпасы:

"Манчестер Сити" (Англия) - "Наполи" (Италия);

"Фейеноорд" (Нидерланды) - "Шахтёр Донецк" (Украина).

"G" тайпасы:

"Монако" (Франция) - "Бешикташ" (Түркия);

"Порту" (Португалия) - "РБ Лейпциг" (Германия).

"H" тайпасы:

"Реал Мадрид" (Испания) - "Тоттенхэм" (Англия);

"АПОЭЛ" (Кипр) - "Боруссия Дортмунд" (Германия).