Өмүрбек Текебаев менен Дүйшөнкул Чотонов дале болсо №1-СИЗОдо кармалууда

Депутат Өмүрбек Текебаев менен экс-министр Дүйшөнкул Чотонов дале болсо №1-СИЗОдо кармалууда. Текебаевдин юристтеринин бири Канат Азиздин 18-октябрда SUPER.KG'ге билдиришинче, соттолуучуларды башка абакка которуу маселеси эртең чечилиши мүмкүн. "Биз аларды №47-абакка которуу боюнча кат менен кайрылганбыз. Бул маселе 19-октябрда чечилиши мүмкүн", - деди Канат Азиз.

Ал эми юрист Бишкектин Биринчи Май райондук соту менен шаардык соттун Текебаев менен Чотоновду камакка алуу чечими боюнча Жогорку Сотко кайрыла электигин кошумчалады. "Азырынча Жогорку Сотко кайрыла элекпиз. Бир жылдын аралыгында кайрылууга укуктуубуз", - деди ал.

Эскерте кетсек, ушул жылдын 16-августунда Биринчи Май райондук соту Текебаев менен Чотоновду 8 жылга эркинен ажыратып, мүлкүн мамлекетке чегерүү жана бошотулгандан кийин үч жыл мамлекеттик кызматта иштебөө тууралуу өкүмүн чыгарган. Бирок Башкы прокуратура райондук соттун өкүмүнө макул болбой, соттолуучулардын абакта өтөөчү жаза мөөнөтүн узартып берүүсүн сурап, Бишкек шаардык сотко апелляциялык арыз менен кайрылган. 2-октябрда Бишкек шаардык соту райондук соттун өкүмүн күчүндө калтырган.

Кошумчалай кетсек, соттолуучулардын жактоочулары шаардык соттун чечимин жокко чыгаруу өтүнүчү менен Жогорку Сотко кайрылышарын билдиришкен.