Алмазбек Атамбаев: “Сакал койгон "чала молдолор” кыргыз элинин жана исламдын душманы”

Бүгүн, 18-октябрда өлкө башчы Алмазбек Атамбаев мыкты студенттерге президенттик стипендия берди.

Ал студенттерди билим алууга үндөп, диний сабатсыздыкты жоюуга чакырды. Атамбаев жогорку жана орто билим берүү мекемелерине куран китептерин өз каражатынын эсебинен таратууга да даяр экенин айтты.

“Айрым имамдар, сакал койгон "чала молдолор" мусулмандардын ой-жүгүртүүсүн өлтүрүп, орто кылымга алып баргысы келип жатат. Ой-жүгүртүүдөн кереметтер жаралат. Урматтуу менин мекендештерим, балдарым, ойлонгула. Куранды окугула. Мен силер үчүн атайылап ар бир университетке, мектепке таратпасам болбой калыптыр. Болгону 20 барак болот, курандын сөздөрүн окугула. Курани каримди биздин "чала молдолор" башка жактагылардан үйрөнүп алып, таптакыр башка жакка алып бара жатат. Динде "мажбурлоо, таңуулоо" жок деп турса, алар "дамбал кийгиле, башыңарга кара мүшөк кийгиле" дешүүдө. Алар кыргыз элинин душманы, исламдын душманы”, - деди Атамбаев.