Журналист Ксения Собчак Орусиянын президенттигине талапкерлигин коёт

Орусиялык журналист жана алып баруучу Ксения Собчак 2018-жылдын март айында өтө турган президенттик шайлоого катышат. Мындай маалыматты орусиялык маалымат булактары жазууда.

"Мен 36 жаштамын, Орусиянын жараны катары президенттикке талапкерлигимди коюу укугум бар. Мындан тышкары буга чейин ушул укукту пайдаланып келгендердин баарына каршымын. Мен баарына каршы добуш берүү мүмкүнчүлүгүн кайра алып келгим келет", - деп билдирет Собчак.

Ошондой эле журналист көп жылдардан бери саясатта жүргөндөрдүн атын атап, өлкөнү өзгөртүү үчүн эски жүздөрдү жаңы лидерлерге алмаштыруу керек экендигин айткан. Муну менен ал калкты шайлоого кайдыгер карабоого чакырган.

Буга чейин Орусиянын RTVI телеканалы Ксения Собчактын президенттик шайлоого талапкерлигин коёрун, бирок ал 2012-жылкы шайлоодогу миллиардер Михаил Прохоровдун ролунда болорун билдирген. Прохоров ошол жылы өткөн шайлоого катышып 7,98 пайыз добушка ээ болгон. Аталган телеканал эгер шайлоого чейинки үгүт иштерин туура жүргүзсө Собчак шайлоочулардын 8-9 пайызынын добушуна ээ болорун айткан.

Ксения Анатольевна Собчак - 1981-жылдын 5-ноябрында төрөлгөн. Радио жана тележурналист, алып баруучу, коомдук ишмер жана саясатчы. "Дом-2", "Блондинка в шоколаде", "Последний герой" реалити-шоу, "Госдеп-2", "Собчак живьём" берүүлөрү менен белгилүү болгон. Орусия оппозициясынын координациялык кеңешинин мүчөсү болгон. Санкт-Петербург шаарынын мурдагы мэри Анатолий Собчактын кызы.