Депутат Кыргыз жерине көчүрүлүп келген памирлик кыргыздардын жашоосуна көңүл бурууга чакырды

Бүгүн, 19-октябрда Жогорку Кеңештин "Республика-Ата Журт" фракциясынан депутат Курманкул Зулушев жакында Памирден көчүрүлүп келген 33 этникалык кыргыздардын мындан аркы абалы кандай болоруна кызыкты. Ал өкмөттүн тиешелүү адамдарын чакыртып, бул маселеде маалыматтарды угуу шарт экенин айтты.

"6 жылдан бери Кыргыз мамлекети тарабынан памирдеги этникалык кыргыздарга жетиштүү көңүл бурулбай, жакшы иш-чара жүрбөй жаткан. Мына акыркы убакта 30дан ашык памирлик кыргыздарды алып келишти. Эми өкмөттүн тиешелүү адамдарына ыраазычылык билдирип, Нарын жергесине көчүрүп келгенден кийин алардын жашоосуна да көңүл бурсак. Булардын адаптация болушуна да чоң көңүл буруп коюу зарыл. Ошондуктан бул маселелерге да көңүл буруп коюу керек", - деди депутат Зулушев.

Эске салсак, 12-октябрда Ооганстандын Памир өрөөнүндө жашаган 6 үй-бүлө, жалпы 33 этникалык кыргыз мекенибизге көчүрүлүп келген.