Украиналык спортчу 26 жыл мурун зордукталганын ачыктап, ошондо коргогон эмессиң деп Кыргыз машыктыруучусун айыптоодо

"Кыргыз өлкөсүнөн спорттук гимнастика боюнча машыктыруучу Татьяна Торопова менин зордукталганымды билип туруп жардам берген эмес". Машыктыруучуну мындай абалга спорттук гимнастика боюнча Дүйнө чемпиону жана Олимпиаданын 2 жолку чемпиону Татьяна Гуцу айыптоодо. Украиналык спортчу Гуцу мындан 26 жыл мурун болгон окуя деп социалдык тармактагы баракчасына пост жазган.

Ал өзүнүн билдирүүсүндө, аны 15 жашында Олимпиаданын 6 жолку чемпиону, беларустук Виталий Щербо зордуктагандыгын жазган.

"Мени 1991-жылы Штутгартта (Германия) ким зордуктаган. Виталий Щербо. Монстр, анын айынан мен нечендеген жылдар бою коркунуч капканында жашадым. Мен билем, сен өзүңдү актаганга аракеттенесиң. Бирок менде толтура маалыматтар бар, алар сенин актанган сөздөрүңдөн өтө күчтүү. Мен азыр сенден күчтүүмүн, сен эми мени сындыра албайсың", - деп жазган 41 жаштагы Гуцу.

Ушул эле постунда ал Татьяна Тараповага кайрылып, аны курбум деп атаган.

"Татьяна Торопова, сени өзүмдүн курбум жана СССРдин улуттук курама командасындагы жолдошум деп эсептечүмүн. Мага абдан зарыл болуп турганда сен эр жүрөктүүлүк кыла албай койгондугуң үчүн рахмат. Бул жүрөктүн үшүн алган окуяда сен мен тарапта болуп, аялдардын укугун коргобогондугуң үчүн сага рахмат. Жок болсо жок. Сен баарын уксаң да мени коргогонго аракет кылган жоксуң", - деген ал.

Бул арада машыктыруучу Татьяна Торопова ал билбеген эле окуяга Гуцу аны күнөөлөп жаткандыгын айткан.

"Мен эч кандай зордуктоого күбө болгон эмесмин. Андан бери көп жыл өттү, бирок эч кандай зордуктоо болгонун эстей албайм. Штутгартта эркектердин мелдеши кыздардын мелдешинен бир күн мурун бүткөн, кечинде Гуцу экөөбүз жаткан бөлмөгө Виталий Гуцунун өзү менен келген. Түн бир оокумга чейин сүйлөшүп отуруп, мен Виталийден өзүнүн бөлмөсүнө кетүүсүн өтүнгөм. Бирок Гуцу стресске кабыла тургандай зордуктоо болгонун такыр көргөн эмесмин, эмне үчүн ал мени бул окуяга айыптап жатат, түшүнбөйм", - деген ал интервьюсунда.