Жанар Акаев: “Жер-Үй” кенинен түшкөн каражатка курулат деген мектептер азыркыга чейин ишке кире элек”

Жогорку Кеңештин эркин депутаты Жанар Акаев “Жер-Үй” кенине лицензия сатуудан түшкөн каражатка курулат деген мектептер азыркыга чейин ишке кире электигине нааразы болду. Бул тууралуу ал бүгүн, 23-октябрда парламенттин тармактык комитетинде билдирди.

“Лицензиядан түшкөн каражатка 100 мектеп курулат деп айтылган. Канчасы салынып, канчасы ишке кирди?” - деп сурады эл өкүлү.

Каржы министри Адылбек Касымалиевдин айтымында, 3 миллиард 600 миллион сом түшкөн. “Сметалык долбоор боюнча иш кагаздары кеч түшкөн. Тендер 2016-жылдын декабрь айында өткөн. Ошондуктан мектептер быйыл бүтпөй калды”, - деди министр.

Жанар Акаев бир жыл өтсө дагы мектептер бүтпөй жатканы жаман көрүнүш экенин айтты. Министр буга бир жыл ичинде бүтүрүлөт деп убада берилбегенин эскертти.