СУПЕРСТАН: "Жашоо ушундай оор, ага бийлик, өкмөт күнөөлүү" деп эмнеге наалый бересиңер?"

SUPER.KG порталынын "Суперстан" бөлүмүндө "Эмнеге наалый бересиңер?" деген тема талкууга алынган.

Темадагы автордун билдирүүсү:

"Эмнеге наалый бересиңер? "Жашоо ушундай оор, ага бийлик, өкмөт күнөөлүү, алардан башка ким күнөөлүү болмок эле... Заман бузулду, минтти, тигинтти... Жашообузду бузгандарга наалат, тигинтип калсын, минтип калсын, жазасын алсын..." дагы айта берсем түгөнбөйт. Буга бир далил, баарыбыз эле окуган "Соңку кабардагы" комментарийлер. Айтор айланабыздагы нерселердин баары негативге толгон. Эмнеге наалый беребиз, кыргызым? Эмнеге күнөөнү өзүбүзгө эмес бирөөгө койгондон ырахат алабыз?"

Темадагы билдирүүлөрдөн:

"Бардык нерсеге эле чиновниктерди күнөөлөгөндөргө таң калам. Эли жерим үчүн иштейин дегендер бар. Бирок "бир карын майды бир кумалак чиритет" дегендей, арасында жеп ичкичтери бар. Мисалы, жолдор оңдолуп жатат, бул жакшы деп кубангандын ордуна "акчасынан жешти да, мурда эле оңдошпойт беле, Орусияда мындай, Европада тигиндей" деп наалып киришет. Өздөрү Ак Үйгө жумушка кирсе, эртеси Кыргызстан оңолуп кете тургандай сүйлөшөт".

"Бул жерде "мен наалыбайм, наалыганды жаман көрөм, тигиндей-мындай деп көп актанбагыла. Эч кимиңер мен наалыган эмесмин деп кепилдик бере албайсыңар. Себеби кээде чындыгында бийликти сөз кылганга туура келип калат, ошондо айла жок сүйлөп каласың. Быйыл билесиңер, Боинг кырсыгы жөнүндө сөз кылбаган, наалыбаган жаран калган жок, булардын катарында жогоруда "түшүнбөйм ушуларга" дегендер деле бийликти айыптап наалыганы турган кеп. Шайлоону айтпай эле коёюн, ушундай учурларда ушул бийликти сөз кылбайын десең да айткың келет. Кээ бир учурда ушундай, наалыганга туура келет экен".

"Мен көп наалыгандардын катарына кирем. Бирок бийликке нааразы эмесмин. Көбүнчө тапшырманын көптүгүнө, жумушта болсо коноктордун көптүгүнө наалыйм. Көчөдө болсо күндө эле жамгыр жаай берсе наалыйм. Наалып турбаса болбойт, адамга эч нерсе жакпайт. Бардык нерсе эле жакшы боло берсе, анда дагы наалыйсың да".

"Ушу бийлик десе эле наалыгым келет. Наалыбаган мигрант жок болсо керек".

Талкууга кошулгуңуз келсе, бул жакка кириңиз.