Тазабек Икрамов: "Төрөбаев "Өнүгүү-Прогресстин" лидерлигинен кетиши керек эле"

"Өнүгүү-Прогрес" фракциясынын лидери кеңешип иш алып барбагандан кийин лидерликтен өзү кетиши керек болчу", - деп билдирди бүгүн, 26-октябрда SUPER.KG порталына депутат Тазабек Икрамов.

Кечээ аталган фракция өз катарынан 3 депутатын чыгарган, алардын бири Тазабек Икрамов болчу.

"Лидер биз менен кеңешпей иш алып барган. Мындай учурда өзү кетиши керек болчу. Алардын 3 депутатты фракциядан чыгаруу чечими эч кандай мыйзамда жок. 12 адам биригип дагы бир адамды фракциядан чыгара албайт. "Бизди колдогон жок" деп айтышыптыр. Туура, буга чейин булардын оюна кошулбай жүргөм. Жеке кызыкчылыгын же булардын бийликке келип бизнес кылышын каалабайм. Мен булардын кызыкчылыгын эмес, элдин кызыкчылыгын көтөрүп келем. Исхак Масалиевди спикерликке колдобогонум чын. Ооба, спикерликке жаштар келиши керек", - деди Икрамов.