5 айдан бери дайынсыз болгон аялдар Тынч океанынан тирүү табылды

5 айдан бери дайынсыз болуп жаткан аялдар Тынч океандан табылды. Мындай маалыматты чет элдик басылмалар жазууда.

Маалыматта жазылгандай, америкалык "Эшланд" десанттык кемесиндеги аскерлер Тынч океандагы яхтаны көрүп калышкан. Алар яхтага келгенде анда 2 аял жашап жүргөнү белгилүү болгон. Өз алдынча саякаттоону чечкен аялдардын яхтасынын кыймылдаткычы бузулуп, океанда калып калган.

Женнифер Аппель жана Таша Фуаба аттуу жарандар Гонолулу шаарынын тургундары. Алар 2 итин алып Гаваиден Таитиге саякаттоо үчүн май айларында өздөрүнүн яхтасы менен океанга барышкан. Бирок аз убакыттан соң яхтанын кыймылдаткычы жараксыз болуп бузулуп, буга кошумча ошол маалда болгон катуу шамал аларды жолдон адаштырган. Алар бул убакыт аралыгында жээкке чыгууга мүмкүнчүлүк таба алышкан эмес.

5 ай өткөн соң гана аларга жакын жерде америкалык аскер кемеси көрүнгөн. Аскерлер жардамга келип аялдарды жана алардын иттерин куткарып калышкан.

Алар саякатка чыгар алдында сулу, күрүч, макарон өңдүү азыктарды кенен камдап алышкан жана суу фильтрлеген жабдыктары болгон. Алардын дээрлик жарым жылга чейин аман калуусуна саякат алдында дыкат камдангандыгы себеп болгон.