Орусиялык депутат Кыргыз жарандарына Орусия аймагында улуттук айдоочулук күбөлүк менен иштөөсүнө тыюу салууну сунуштады

Орусиянын Мамлекеттик Думасынын вице-спикери, Владимир Жириновскийдин ЛДПР фракциясынан депутат Игорь Лебедев Кыргыз жарандарына Орусия аймагында улуттук айдоочулук күбөлүк менен иштөөсүнө тыюу салууну сунуштады. Бул тууралуу бүгүн, 27-октябрда орусиялык басылмалар жазып чыгышты.

"Буга чейин биз "Кыргыз Республикасында орус тили расмий тил катары кабыл алынган" деп улуттук айдоочулук күбөлүк менен иштөөсүнө уруксат берип, саясий чечим кабыл алганбыз. Бирок кыргыздар Орусияга каршы көтөрүлүштү улуттук майрам катары бекитишти. Мындай иш достук мамилеге жатпайт. Кыргыздар экзамен тапшырып, орусиялык үлгүдөгү айдоочулук күбөлүк алышсын", - деди депутат Лебедев.

Эскерте кетсек, кечээ, 26-октябрда президент Алмазбек Атамбаев 7-8-ноябрда жыл сайын Тарых жана ата-бабаларды эскерүү күндөрүн белгилөө жөнүндө жарлыкка кол койгон.

Буга чейин 2017-жылдын июль айында Орусиянын Мамлекеттик Думасы Кыргыз өлкөсүнүн айдоочулук күбөлүгүн тааныган мыйзамды колдогон. Президент Владимир Путин бул мыйзамга кол койгон.