КСДП фракциясы 8-ноябрды өткөндөрдү эскерип, тарых күнү деп белгилөө боюнча президенттин жарлыгын колдоду

Бүгүн, 27-октябрда КСДП фракциясы 8-ноябрга карата президенттин жарлыгын карады.

“8-ноябрда жыл сайын өткөндөрдү эскерип, тарых күнүн белгилөө боюнча президенттин жарлыгы чыкты. Бул боюнча Жогорку Кеңеш токтом кабыл алышы керек. 8-ноябрь майрам болушу үчүн ага да мыйзам керек экен. Мындан улам жарлыкты колдоп коёлу”, - деп кайрылды фракция лидери Иса Өмүркулов депутаттарга.

Депутат Айнуру Алтыбаева бул президент тарабынан көтөрүлгөн туура маселе деп билдирди.

“Октябрь революциясынын күнү постсоветтик өлкөлөрдүн ичинен Кыргыз мамлекетинде жана Беларуста эле белгиленет экен. Өлкө башчысынын жарлыгы өз убагында чыгып жаткандыктан баарыңарды колдоого чакырам”, - деди Алтыбаева.

КСДП фракциясы президенттин жарлыгын колдоду. Фракция лидери эгер мыйзамды башка фракциялар да колдосо, кийинки жумада үч окуудан бир кабыл алынып, быйыл 8-ноябрь дем алыш болорун айтты.