Өлкөдө өкмөттүн колдоосу менен Кожомкул балбан жөнүндө тасма тартылат

30-октябрда парламентте Каба уулу Кожомкул балбан жөнүндө 130 мүнөттүк толук метраждуу көркөм тасма тартуу маселеси каралды.

Маданият, маалымат жана туризм министрлиги аталган тасманы тартууга 70-80 миллион сом талап кылынарын эсептеп чыгып, Каржы министрлигине кайрылган.

Маданият, маалымат жана туризм министрлигинин статс-катчысы Бактыбек Секимов билдиргендей, тасма тартуу ишине ушул жылы 25 миллион сом, ал эми 2018-жылдын эсебинен 45 миллион сом каралат. Ошондой эле статс-катчы кино тартуу жаатында белгилүү кинорежиссёр Болот Шамшиев тарабынан сунушталган сценарий бар экендигин айтты.

КСДП фракциясынан депутат Рыскелди Момбеков: “Курманжан датка” көркөм тасмасы 70 миллион сомго тартылса, эмнеге Кожомкул тууралуу тасма андан 3 эсеге кымбат бааланыш керек?" - деди. Секимов бул баа азырынча сунуш экенин айтып, акыркы чечим сынактын жыйынтыгына жана бюджетте каралган каражатка жараша болорун билдирди.

Тасманы тартуу иши 2018-жылдын 30-июнуна чейин башталып калышы керек. Бул боюнча комитет тарабынан өкмөткө каржы булактарын таап, ишти баштоо тапшырмасы берилди.