Кыргызгидромет: "3-ноябрдан тартып аймактарда жамгыр, тоолордо кар жаашы күтүлөт"

Ысык жана кургак аба ырайынан кийин Кыргыздын аймагында 3-ноябрдан тартып аба ырайы кескин өзгөрөт. Бул тууралуу Кыргызгидрометтен билдиришти.

Маалым болгондой, 3-ноябрда күндүз кээ бир райондордо, 4-5-ноябрда көпчүлүк аймактарда жамгыр жаап, тоолордо кар жаашы, айрым жерлерде жаан-чачын катуу жаашы күтүлөт.

Батыштан соккон шамалдын ылдамдыгы айрым жерлерде секундасына 18-23 метрге жетиши күтүлөт. 4-5-ноябрда Чүй, Талас өрөөндөрүндө жана Ош, Жалал-Абад, Баткен облустарында түнкүсүн абанын температурасы 2 градуска чейин төмөндөйт. Күндүз +15 градус жылуу болот.

Ысык-Көл ойдуңунда жана тоо этектеринде түнкүсүн 0 градус болсо, күндүзү +10 градус жылуу. Нарын облусунун дыйканчылык аймактарында жана тоолуу райондордо түнкүсүн -8 градус суук, күндүзү +8 градус жылуу болору күтүлөт. Ал эми бийик тоолуу райондордо түнкүсүн -18 градус, күндүзү -7 градус суук болушу күтүлөт.

Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат.