Өзбекстандын тунгуч президенти Ислам Каримовдун уулу бар экени айтылууда

Өзбекстандын тунгуч президенти Ислам Каримовдун Лола жана Гүлнара аттуу кыздарынан сырткары Пётр деген уулу бар экенин өзбек басылмалары жазып чыгышты.

Мындай маалымат Ислам Каримовдун илимий-агартуу комплексинин жакында эле ачылган сайтында пайда болгон. Анда тунгуч президенттин 3 баласы жана 6 небереси бар экени жазылган. Ал эми буга чейин 2 кызы, 5 небереси тууралуу гана маалыматтар айтылып келген.

Белгилүү болгондой, Каримов 1960-жылы Наталья Кучма аттуу айымга үйлөнүп, 1969-жылы Пётр Каримов деген уулдуу болгон. Азыркы учурда ал Москвада жашайт. Ошондой эле "Фергана" басылмасынын жазып чыкканына таянсак, ал мурда "Азия-Инвест-Банктын" башкаруучу өкүлүнүн орун басары кызматын аркалаган.

Айта кетсек, Ислам Каримов Өзбекстан эгемендүүлүккө ээ болгондон тарта, өмүрүнүн соңуна чейин аталган өлкөнү башкарып келген.