WhatsApp'тан жаңы функция: эми жөнөтүлгөн билдирүүнү өчүрүүгө болот (толукталды)

WhatsApp тиркемесинде жөнөткөн билдирүүнү өчүрүп салуу мүмкүнчүлүгү пайда болду. Бул тууралуу тиркеменин түзүүчүлөрү кабарлайт.

Маалыматка ылайык, WhatsApp тиркемесинин түзүүчүлөрү СМСти "бардыгынан өчүрүп салуу" жаңы функциясын киргизген. Башкача айтканда, эгер сиз бирөөгө туура эмес билдирүү жазып алсаңыз, ал ачып караганга чейин дароо өчүрүп жетишсеңиз болот. Ал үчүн алгач тиркемени жаңылоо керек. Андан соң жиберилбеши керек болгон билдирүүлөрдү басып белгилесеңиз, (сүрөттө) экрандын башындагы оң жак бөлүгүнө түрдүү варианттар чыгат. Арасынан "өчүрүү" белгисин тандасаңыз "өзүмдөн өчүрүү", "баш тартуу", "бардыгынан өчүрүү" деген варианттар пайда болот. Арасынан керектүүсүн тандоону басканда билдирүү өчүрүлөт.

Билдирүүнү өчүрүп салуу функциясы эки адамдын баарлашуу чатында гана эмес, группалык чаттарда да бар. СМСти өчүрүү үчүн 7 мүнөт гана берилет. Бул убакыттын ичинде өчүрүп жетишпей калсаңыз, кийин мүмкүн болбой калат.

WhatsApp'тын жаңыланган акыркы версиясында быйтыкчаларга дагы өзгөрүүлөр киргенин байкоого болот. Мурдагы быйтыкчаларга көнүп калган колдонуучулар жаңылангандардын көрүнүшүнө көздөрү көнбөй жатканын комментарийлерде жазышууда.