ЖЫЛНААМА, 2-НОЯБРЬ: 35 жашка толгон Айжамал Кабылова туулган күнү менен уулунун сүннөт тоюн чогуу өткөрө турганын айтты

Бүгүн, 2-ноябрь - легендарлуу "Кыз-бурак" тобу аркылуу элге аты таанылган эстрада жылдызы Айжамал Кабылованын туулган күнү. SUPER.KG порталы ырчыны куттуктап байланышка чыкканда, бүгүн үй-бүлөсүндө кош майрам экенин айтты.

"Азыр Оштомун, кечээ концертте жүрүп үйгө кеч келгем. Аз өтпөй эле эшигимдин коңгуроосу кагылып, ачсам Асел Касымова, Максат Довранов баштаган кесиптештерим таттууларын көтөрүп алып куттуктап келишиптир. Бүгүн менде кош майрам, тагыраагы, маданият кызматкерлеринин күнү жана туулган күнүм. Аны менен катар уулумду сүннөткө отургузгам, кечинде тууган-урукту чакырып, бата алсак деп ниет кылып жатам. Азыр ошого даярданып, базарда жүргөн болчумун", - деди ырчы.

Айжамал Кабылова 1982-жылы 2-ноябрда Ош облусуна караштуу Кара-Суу районунун Отуз-Адыр айылында төрөлгөн. Болочоктогу ырчы 6-классынан тарта "Кыз-Бурак" тобуна алынып, аталган топтун негиздөөчүсү жана жетекчиси Гүлшайыр Садыбакасованын колунда тарбияланган. Турмушка чыкканга чейин аталган топто чыгармачылыгын өстүрүп, үй-бүлөлүү болгон соң топтон кетип, чыгармачылыгында тыныгуу жасаган. Ал арада ырчы 1 кыз, 1 уулдуу болгон. 2010-жылдан тарта Айжамал Кабылова жеке ырчы катары чыгармачылыгын уланткан. Өткөн жылдын январь айында жолдошу менен түшүнбөстүктөр болуп, эки башка жолду тандашканын жарыялаган.

Айжамал Кабылова тууралуу фактылар:

• "Жамгырдын жаап турганынан ырахат алам. Кызыгы, жыл сайын туулган күнүмдө белек катары жаан жаайт", - деген ырчы өз маегинде. Ал эми бүгүнкү туулган күнүндө жамгыр жаайбы же жокпу азырынча белгисиз;
• Сүт азыктарын таптакыр жей албайт, ачуу тамактарды жакшы көрөт;
• “Сволочь” деген сөздү көп колдонот. Кийин өзү байкап калып ачуусу келет;
• Мурда таарынычы кеч жазылчу, азыр деле таарынчаак, бирок бат эле жазылып кетет;
• Көк бет, кылам деген ишин аягына чыгармайынча жаны тынбайт.

2-ноябрдын жылнаамасы.