7-8-ноябрь өлкөдө дем алыш күндөрү деп жарыяланды

7-8-ноябрь ата-бабаларды жана тарыхты эскерүү күнү катары ушул жылдан тартып дем алыш деп жарыяланды. Бүгүн, 2-ноябрда бул тууралуу токтомду Жогорку Кеңештин депутаттары колдоду.

Тиешелүү документ менен КСДП фракциясынан депутат Айнуру Алтыбаева тааныштырды. Ал 7-8-ноябрь ата-бабаларды жана тарыхты эскерүү күнү катары жарыялоо боюнча өлкө башчысынын жарлыгынын негизинде токтом сунушталып жатканын айтты.

Добуш берүүгө 56 депутат катышып, "каршы" добуш бергендер болгон жок.

Буга чейин премьер-министр Сапар Исаков 28-октябрдагы эс алуу күнүн 6-ноябрдагы жумуш күнү менен алмаштыруу тууралуу токтомго кол койгон. 5 күндүк иш графигинде эмгектенген мекеме, ишкана жана уюмдардын кызматкерлери 4-ноябрдан 7-ноябрга чейин 4 күн катары менен эс алышат.