Президент 43 жыл мурун тургузулган Кыргыз-Орус достугун чагылдырган "Элдер достугу" эстелигин көрктөндүрүү үчүн 3 миллион 111 миң сом бөлдү

Президент Алмазбек Атамбаев Бишкек шаарындагы Кыргыз-Орус достугун чагылдырган "Элдер достугу" эстелигин көрктөндүрүү үчүн 3 миллион 111 миң сом бөлдү. Бул тууралуу бүгүн, 3-ноябрда президенттик аппараттын маалыматтык саясат бөлүмү билдирди.

Маалыматка ылайык, бул акча Бишкек шаарынын мэриясы борбордук "Ала-Тоо" аянтынын жанындагы Кыргыз-Орус достугун чагылдырып турган "Элдер достугу" эстелигин көрктөндүрүү үчүн каражаттык колдоо катары бөлүнүп берилген.

Маалымат үчүн: Бишкек шаарынын борбордук "Ала-Тоо" аянтындагы "Элдер достугу" монументи 1974-жылы ачылган. Анын авторлору скульпторлор Т.Садыков, З.Хабибулин, О.Б.Бакашев, архитектор А.Нежурин. Монументтин бийиктиги 28 метрди түзүп, бетондон турган, экиден канатты элестеткен 4 пилондон турат. Алардын беттери ак мрамор таш менен капталган. Ошондой эле эстеликтин негизи боз мрамордон тургузулган 13 фигурадан турат. Алардын арасында 2 эне - орус жана кыргыз аялдары бири-биринин колун кысып, достуктун символун чагылдырып турушат.