Ырчы Алмаз Шаадаевге жеке концертинде "Маданияттын мыкты кызматкери" төш белгиси тапшырылды (фоторепортаж)

4-ноябрда Каба уулу Кожомкул атындагы спорт сарайында эстрада ырчысы Алмаз Шаадаевдин жеке концерти өттү.

Бишкек шаарында 2-жолу жеке концертин берип жаткан ырчы мырза бул кечеге 2 айга жакын убакыт даярданганын айтат.

"Биринчи жолу өткөргөн концерттен сабак алып, анда кетирген кемчиликтерди жоюунун үстүндө иштедик. Концертти көптөгөн кызыктар коштойт. Маселен фокусниктер менен чогуу түрдүү кызыктарды тартуулайбыз" - дейт Шаадаев.

Көпчүлүктүн кол чабуусунун коштоосунда концерт башталып, Шаадаев сахнага демейдегиден башкача чыкты. Тактап айтканда, сахнага сүрдүү караандар чыгып, алар ортого коюлган кичинекей бөлмөдөн чыгып жатты. Соңунда ырчы мырза да ошол жактан чыгып, концертин "Мейли" аттуу ыры менен баштады.

Алып баруучулук кызматты Сакиш, Бопуш тандеми аткарып, келген конокторго ырга катар күлкү тартуулап жатышты.

Ырчы "Фаридам" аттуу чыгармасын аткарып, бул анын репертуарындагы эң жемиштүү ыр экенин белгиледи. Өткөн жылы гана жаздырганына карабастан барган жеринде "Фаридамды" аткаруусун суранышарын айтты ырчы.

Алып баруучулар Алмаздын эң жакын досу деп сахнага Данияр Эрматовду чакырышты. "Апамдын болчу келини" деген ырын аткаруунун алдында ал келген конокторго Алмаз Шаадаевдин атынан ыраазычылык билдирип, досуна чыгармачылык ийгилик, эргүү каалады.

Концерттин жүрүшүндө залда отурган ар бир көрөрманды бир саамга ойго салган ыр аткарылды. Алмаз Шаадаев "Жаркырасын Кыргызстан" деп аталган ырын аткарып жатканда сахнага бир нече мекен сакчылары тизилип турушту. Өлкөдөгү жетишкендиктерге катар орун алган кемчиликтер камтылган саптар концертке келгендердин жүрөгүнөн түнөк тапканын ырдан кийин көпкө чейин токтобой кол чабуулар далилдеди.

Андан кийин алып баруучулар сахнага Маданият, маалымат жана туризм министрлигинин өкүлдөрүн чакырышты. Алар Шаадаевге "Маданияттын мыкты кызматкери" төш белгисин ыйгарышты. Шаадаев өз кезинде күтүлбөгөн учурда берилген төш белги аны катуу толкундантканын, кубандырганын айтты.

"Чынында бүгүн өтө чоң кубанычтуу күн болду, бул төш белги мага мындан ары да маанилүү ырларды жазып аткарууга, тынымсыз эмгектенүүгө стимул берет. Ата-энем да ушул залда отурат, аларга, министрликке, жалпы менин күйөрмандарыма ыраазычылык билдирем", - деди ал.

Көп кызыктар коштолгон бул концертте Шаадаев ата-энесинин жанына барып, аларга арналган ырын аткарды. Ага улай эле ырчы мырзанын ата-энеси келген конокторго дуэт аткарып беришти.

Зал элге 99 пайызга толуп, 2 сааттан ашык убакытка созулган концертти ырчы көтөрүңкү маанайда "Фаридам" аттуу альбому жарык көргөндүгүнө байланыштуу кайрадан "Фаридам" чыгармасын ырдап жыйынтыктады. Концерт жөнүндө даярдалган видеорепортаж жакынкы күндөрү SUPER.KG'нин "Супер ТВ" бөлүмүнө жайгаштырылат.