Жактоочу Улан Жумаков депутат Аида Салянованын өмүрү коркунучта экенин билдирди

Жактоочу Улан Жумаков депутат Аида Салянованын өмүрүнө кооптонуу жаралганын бүгүн, 6-ноябрда билдирди.

Жумаков убагында Аида Салянова башкы прокурор болуп Мамлекеттик резиденцияда жашап турганда резиденцияны кайтарган жоокерге кол салуу болгонун, андан Салянова жашаган коттеджге барчу жолду көрсөтүүнү талап кылганын эскертет. Ошондой эле Салянова Башкы прокуратураны жетектеп турганда уюшкан кылмыштуу топторго каршы активдүү күрөш жүргүзгөнүн да айтты. Бүгүн Аида Салянованын инисинин өлтүрүлүшү депутаттын өмүрү коркунучта экенин көрсөтүп жатканын айткан адвокат УКМК Салянованы күзөт кызматы менен камсыздоо керектигин баса белгиледи.

Эскерте кетсек, 6-ноябрга караган түнү Бишкекте белгисиз адамдар Жогорку Кеңештин депутаты Аида Салянованын иниси Улан Саляновду өз үйүнөн атып кетишти. Маркум 42 жашта болгон. Азыркы тапта милиция кызматкерлери кылмышкерлерди издеп жатат.