Чек ара кызматы: "Кыргыз-Казак чек арасында кезек күткөн 65 унаа калды"

Кыргыз-Казак чек арасында кезек күткөндөрдүн саны азайды. Бул тууралуу SUPER.KG'ге Мамлекеттик чек ара кызматынын коомчулук менен байланышуу бөлүмүнөн 6-ноябрда кабарлашты. Бөлүмдүн кызматкери Салкын Абдыкарыеванын билдиришинче, 3 күн мурун "Ак-Тилек" өткөрмө пунктунда 300гө жакын оор жүк ташуучу унаа кезек күтүп турган болсо, учурда анын 65и гана калды.

"3 күндөн бери чек арадагы өткөрмө пункттарында элдин, унаалардын саны азайды. "Ак-Жол" пунктунда турган элдин саны 30га, жеңил унаалардын саны 10-15ке жетет. "Ак-Тилек" пунктунда оор жүк ташуучу унааларды бүгүн эртең менен санаганыбызда 65 унаа турган. Таластагы " Чоң-Капка" пунктунда жеңил жана оор жүк ташуучу унаалардын саны 60, "Чалдыбар" пунктунда элдин жана унаанын тыгыны жок", - деди Абдыкарыева.

Кыргыз-Казак чек арасындагы тоскоолдуктар 10-октябрда жаралып, ошол күндөн бери бир канча оор жүк ташуучу унаалар жүк алып өтө албай кезекте турган. Өкмөт башчы Сапар Исаков 18-октябрда Астанага барып эки тараптуу сүйлөшүү жүргүзгөндөн кийин жүргүнчүлөргө жол ачылып, бирок жүк алып өтүү маселеси чечилген эмес. Кечээ Ереван шаарында Евразия өкмөттөр аралык кеңештин алкагында маселени чечүү үчүн иштелип чыккан жол картага кол коюлмак. Бирок Казакстандын өкмөт башчысы Бакытжан Сагинтаев кол коюудан баш тартып койгон.