ЖЫЛНААМА, 7-НОЯБРЬ: Табышмактуу жагдайда жол кырсыгынан каза тапкан тунгуч өкмөт башчы Насирдин Исанов 74 жыл мурун Ноокат районунда туулган

Кыргыз мамлекетинин биринчи премьер-министри Насирдин Исанов 74 жыл мурун 1943-жылы 7-ноябрда Ош облусунун Ноокат районундагы Көк-Бел деген айылда жарык дүйнөгө келген.

Ал Москвадагы Инженердик-курулуш институтун жана Алматыдагы Жогорку партиялык мектепти бүтүрүп, эмгек жолун Москва шаарындагы курулуш башкармалыгында жумушчу болуу менен баштаган. Андан кийин Ош шаарынын Курулуш-монтаждоо башкармалыгында мастер, прораб, аймактын башчысы болуп иштеген. Кийинчерээк башкы инженер, тресттин башкы технологу, партиянын Ош обкомунун курулуш бөлүмүнүн инструктору, "Нарынгидрострой" курулуш башкармалыгынын парткомунун катчысы, комсомолдун Ош обкомунун биринчи катчысы, Кыргыз ССР Курулуш министри, Кыргыз ССР Мамлекеттик курулуш комитетинин төрагасынын биринчи орун басары - Кыргыз ССРинин министри, Эл депутаттарынын Ысык-Көл облустук кеңешинин Аткаруу комитетинин төрагасы, Кыргыз Республикасынын вице-президенти кызматтарында эмгектенген.

1990-жылы президенттик шайлоого катышып, Аскар Акаевден кийин 2-орунду ээлеген. Аскар Акаев берген убадасы боюнча аны 1991-жылдын 22-январында премьер-министр кылып дайындайт.
Бирок 1991-жылы 29-ноябрда 48 жашында түшүнүксүз жагдайда Бишкек-Ош унаа жолунда автокырсыктан көз жумуп, “Ала-Арча” көрүстөнүндө жерге берилген. Эл ичинде “Акаев Исановдун саясий кадыр-баркынан чочулап, ошон үчүн атаандашынын көзүн тазалаткан” деген кептер айтылып келет.

Ал Экономика илимдеринин кандидаты, СССР Инженердик академиясынын академиги наамдарына татып, Кыргыз Республикасынын Жогорку Кеңешине депутат болуп шайланган. Ардак белгиси, Эмгек Кызыл Туу ордендери жана "Эмгектеги каармандыгы үчүн" медалы менен сыйланган. Ошондой эле Капиталдык курулуш жана башкаруу системин өркүндөтүү боюнча илимий эмгектердин автору болгон.

7-ноябрга карата жылнаама.