Чыныбай Турсунбеков Жогорку Кеңештин жыйынында депутаттарга "Түтүн" деген өзү жазган ырды окуп берди

Бүгүн, 8-ноябрда Жогорку Кеңештин жыйынында "Атмосфералык абаны коргоо жөнүндө”, ошондой эле “Экологиялык экспертиза жөнүндө” мыйзам долбоору талкууланып жатат.

Анын жүрүшүндө КСДП фракциясынан депутат Чыныбай Турсунбеков учурда өлкөдө дем алуу системинин жана өпкө оорулары менен ооруган адамдардын саны өсүп жатканын айтты. Андан соң ал шаарды каптаган түтүн жөнүндө өзү жазган ырды депутаттарга окуп берди. "Мурда түтүн жөнүндө ыр жазчу эмес элек. Соңку кезде жазганга туура келип калды", - деп ырын окуду депутат.

Өф-өф түтүн, өф түтүн,

Өч шаарыңан көч бүтүн.

Өлүм алып келем деп,

Өжөрлөнөт көк түтүн.

ТЕЦтен чыгат көк түтүн,

Мештен чыгат көк түтүн,

Машиналар чубаса,

Чубайт арттан көп түтүн.

Түтүн менен түртүшүп,

Күндө баарын сүртүшүп,

Бүтө электе көктө күн

Түтүн деген түгөттүн,

Түгөнбөсүн байкашат.

Өф-өф түтүн, өф түтүн,

Өлүп кеткир көк түтүн.

Өрдөк мурун жүлүндүү

Өпкөбүзгө өч бүтүн.

Күнү каптайт калааны,

Түнү каптайт калааны,

Түйшүк кылып алдык биз

Түтүн деген балээни.