Депутат жоокерлер кызматын өтөгөндөн кийин билим алууда кыйынчылыктарга туш болуп жатканын айтты

КСДП фракциясынан депутат Абдывахап Нурбаев жоокерлер кызматын өтөгөндөн кийин билим алуу боюнча кыйынчылыктарга туш болуп жатканын айтты. Бул тууралуу ал кечээ, 8-ноябрда Жогорку Кеңештин жыйынында билдирди.

Анын айтымында, мыйзамда убадаланган жоокерлердин жогорку билим алууга болгон укуктарын коргоо жана аларга жеңилдиктерди кароо зарыл.

“Азыркы учурда жоокерлерибиз кызматын өтөп бүткөндөн кийин кыйынчылыктарга туш болот. Жогорку окуу жайларга тапшырайын десе, ал жакта жалпы республикалык тестирлөөнүн жыйынтыгы менен кабыл алат. Анын жыйынтыгы бир жылга гана жарактуу. Көп жигиттерибиз жумуш издеп чет өлкөлөргө кетип калууда”, - деди депутат.

“Кыргыз Республикасынын аскер кызматчыларынын статусу жөнүндө мыйзамга өзгөртүүлөрдү жана толуктоолорду киргизүү жөнүндө” мыйзам долбоору добуш берүүгө жөнөтүлдү.