Интернетте 2 баласы менен көчөдө жүргөн келин талкууланууда. Ал батирдин акчасын төлөй албай калган

Интернетте 2 баласы менен түн ичинде көчөдө жүргөн келиндин тагдыры талкууланууда. Социалдык тармактын колдонуучусу Болот Темиров кечээ, 8-ноябрда түн ичинде келиндин абалын өзүнүн баракчасына жазып, сүрөтүн жарыялаган.

"Мен аялдамада туруп кичинекей кыздын жалгыз жүргөнүн көрүп таң калдым. Бир убакта ага алыс эмес жерде апасы эмчектеги баласын көтөрүп жүргөнүн байкадым. Түн ичинде жаш балдары менен эмне кылып жүрөт деген суроо жаралып анын абалын сурадым. Көрсө, күйөөсү кичүү кызы төрөлө электе эле каза болуп калыптыр. Арча-Бешик жаңы конушунда 1 бөлмөлүү батирде 3000 сом төлөп жашайт экен. Өзү курут, кант, тамеки, семичке, майда-чүйдө сатып күнүмдүк жашоосуна каражат тапчу экен. Акыркы күндөрү кичүү кызы ооруп калып, үйдө отурууга туура келген. Бүгүн болсо батиринин акчасын төлөй албай, батирге кире албай калган", - деп жазат Темиров.

Ошондой эле ал жол киреге акча берип, келинге батирге кайт деп кеңеш берген. Келин да кожоюну батирдин төлөнбөй калган 800 сому үчүн ачууланбай, киргизип турат деген үмүт менен кайра Арча-Бешикке кеткендигин кошумчалаган Темиров.