Америкалык ырчы Мэрайя Кэрини жан сакчысы сотко берет. Ал ырчыны сексуалдык мүнөздөгү аракеттерди жасады жана басынтты деп айыптоодо

Буга чейин белгилүү актёрлор Дастин Хоффман, Кевин Спейси, продюсер Харви Вайнштейн жана башкалар сексуалдык мүнөздөгү ыплас иш-аракеттерди жасагандыгы боюнча айыпталышса, жакында эле ырчы Мэрайя Кэриге да ушундай айып тагылган. Бул тууралуу чет элдик маалымат каражаттары жазып чыгышкан.

Белгилүү болгондой, 2015-жылдан 2017-жылдын май айына чейин Кэри менен келишим аркылуу чогуу иштешкен күзөт компаниясынын жетекчиси Майкл Анелло ырчыны сотко берүүгө камынууда. Себеби ырчы аны дайыма басынтып, улутчул деп атап келген. Ал гана эмес, башка жан сакчыларды да ар дайым шылдыңга алчу. Ошондой эле бир жолу "жүктү жылдырууга жардам керек" деген шылтоо менен Анеллону мейманканадагы номерине чакырган. Бирок ал барганда жарым жылаңач эшикти ачып, аны интимдик катнашка чакырган. Жан сакчы ачууланып, ырчыны жалгыз калтырган боюнча бөлмөдөн чыгып кеткен.

"6-ноябрь күнү Кэринин өкүлү Анеллонун адвокаты менен сүйлөшүү жүргүзгөн. Анда окуяны сотко жеткирүүнүн кажети жок экени айтылып, ырчы жан сакчыга белгилүү суммадагы каражат төлөп берери тууралуу кеп болгон. Бирок экинчи тарап ырчы сунуштаган суммага көнгөн эмес. Учурда сүйлөшүүлөр уланууда", - деп жазылган маалыматта.