Алмазбек Атамбаев Евробиримдиктин тышкы саясат боюнча жогорку комиссары Федерика Могериниге "Достук" орденин тапшырды

Президент Алмазбек Атамбаев Кыргыз жергесине иш сапары менен келген Евробиримдиктин тышкы саясат боюнча жогорку комиссары Федерика Могерини менен жолугушту. Бул тууралуу президенттик аппараттын басма сөз кызматы билдирди.

Маалыматка ылайык, жолугушууда Атамбаев Федерика Могеринини Кыргыз мамлекети менен Евробиримдиктин кызматташуусуна кошкон салымы үчүн “Достук” ордени менен сыйлады.

Федерика Могерини жакын арада Евробиримдик менен Кыргыз мамлекетинин ортосунда шериктештик жана кызматташтык боюнча жаңы макулдашуунун үстүндө сүйлөшүүлөр боло турганын белгиледи.

Жолугушууда эки тараптуу кызматташтыктагы актуалдуу маселелер талкууланды. Мындан тышкары анда Кыргыз мамлекети менен Евробиримдиктин ортосунда түзүлгөн эки тараптуу макулдашууларды ишке ашыруу, бардык тармакта биргелешип иш алып барууну өнүктүрүү боюнча сөз болду.