Ата-энелер мугалимдердин акча төлөй элек окуучуларга кылган мамилелерине нааразы болушту

Илим күнүнө арналган билим берүү тармагынын өкүлдөрүнүн жыйынында Балдарды коргоо борборунун жетекчиси Эргешова Кумар мугалимдердин мектепке акча төлөй албаган балдарга карата жасаган мамилесине нааразы болду.

"Мугалимдер акча төлөй албаган окуучуларга кыйкырып, орой мамиле жасашат. Бул алардын негизги куралы. Себеби классташтарынан уялган окуучу сөзсүз түрдө ата-энесин мажбурлап, акча талап кылат. Мындан улам балдар психологиялык жактан жабыр тартып, билим алууну ойлобостон акча табууну көздөп башташат. Андыктан акча маселесин ата-энелерге гана айтып, окуучуларды буга кийлигиштирүүнүн кажети жок", - деди ал.

Анын бул пикирин ата-энелер да колдошту, бирок айрым директорлор акчаны бардык мугалимдер эмес, бир гана класс жетекчи сурай турганын айтышып, ата-энелердин өздөрүнө айтуу үчүн аларды чогулушка чакыртышса келишпей турганын билдиришти.

Мындан улам эки тарап кызуу талкууга өтүп, жыйынтыгында мектеп директорлору балдарды коргоо борборунун жетекчиси менен ата-энелердин сөзүн туура табышып, мугалимдерди акча чогултуу маселесине кийлигиштирбөөгө аракет кылышарын айтышты.