Премьер-министр Сапар Исаков Патрулдук милиция башкармалыгында реформа жасоо керектигин айтты

Патрулдук милиция башкармалыгында реформа жасоо керек. Бул тууралуу бүгүн, 10-ноябрда өкмөттүн жыйынында премьер-министр Сапар Исаков билдирди.

Жыйындын жүрүшүндө Сапар Исаков август айында Ички иштер министрлигине жол кырсыктарын эки эсе кыскартуу тууралуу тапшырма берилгендигин айтып, бирок ал аткарылбагандыгын белгиледи.
Ошондой эле ал Ички иштер министрлигине жол кырсыктарынын себептерин жана жалпы ушул тармактагы маселелер тууралуу анализ жасоого бир жума мөөнөт берди.
Андан сырткары Патрулдук милиция башкармалыгында реформа жасап, кызматкерлеринин кесипкөйлүк сапаттарын жогорулатуу керектигин айтты.

“Биз Патрулдук милиция башкармалыгында терең реформа жасашыбыз керек. Ал үчүн атайын өзгөчө иш-чаралар жүргүзүлүшү зарыл. Ал иш-чаралар бул тармактагы коррупциялык иш-аракеттерди токтото турган, алдын ала турган да болуусу керек”, - деди премьер-министр.
Ошондой эле ал Патрулдук милиция башкармалыгынын кызматкерлерин атайын тесттен өткөрүп, эң мыкты кызматкерлерди тандап алуу керектигин айтты.