Ветеринардык коопсуздук боюнча инспекция: "Казакстан Кыргыздын сүт, эт азыктарын киргизүү боюнча расмий маалымат берген жок"

Казакстан Кыргыздын сүт, эт азыктарын киргизүүгө чектөө койгону боюнча расмий маалымат берген жок. Бул тууралуу SUPER.KG порталына бүгүн, 11-ноябрда Ветеринардык жана фитосанитардык коопсуздук боюнча мамлекеттик инспекциясынан билдиришти.

Мекемеден түшүндүрүшкөндөй, учурда Кыргыз жергесинен барган сүт, эт азыктары Казакстанга эч тоскоолдуксуз эле кирип жатканын маалымдашты.

Ал эми Казакстандын жалпыга маалымдоо каражаттары жазып жаткан бөгөт коюлду деген ишканалардын үчөөсү Казакстанга продукция ташыбай тургандыгын айтышты инспекциядан.

"Сүт, эт жана кондитердик азыктарын өндүргөн "Ак-Сүт", "РИХА", "Куликовский" жана "Эмилия" ишканаларынын экөөсүнүн, тактап айтканда, "Куликовский" жана "Ак-Сүт" ишканаларынын ЕАЭБге кирген өлкөлөргө товар ташыганга укуктары жок.

"Куликовский" Казакстанга эч качан продукцияларын алып кирген эмес. Ал эми "Ак-Сүт" ишканасына Казакстанга товар алып кирүүгө 2016-жылы эле бөгөт коюлган. "Эмилия" ишканасы учурда Казакстанга эмес, Орусияга товар ташыйт.

Казакстанга "РИХА" ишканасы гана товар алып барат. Акыркы жолу 3-ноябрда 1,8 тонна эт азыктарын алып кириптир. Эч кандай маселе жаралган эмес", - дешти Ветеринардык жана фитосанитардык коопсуздук боюнча мамлекеттик инспекциясынан.

Андан сырткары эгер кайсы бир ишканалардын товарлары стандарттарга жооп бербесе, ал чек арадан кайтарылып кемчиликтер жоюлган соң, кайра эле киргизиле берилиши керектигин айтышты.

Эскерте кетсек, Казакстан Кыргыз жергесинен сүт, эт жана кондитердик азыктарды киргизүүгө чектөө койгондугу тууралуу Казакстандын ЖМКлары жазып чыккан эле.