Депутат Улан Чолпонбаевди акыркы сапарга узатуу зыйнаты өтүүдө. Ага премьер-министр, спикер катышууда (фото)

Бүгүн, 13-ноябрда Бишкекте Жогорку Кеңештин депутаты Улан Чолпонбаевди акыркы сапарга узатуу зыйнаты өтүп жатат. Коштошуу зыйнатына маркумдун туугандары, Жогорку Кеңештин төрагасы Дастан Жумабеков баштаган депутаттар, өкмөт башчы Сапар Исаков жана башка коомдук-саясий ишмерлер катышууда.

"Улан, сенин көп жакшы ой-максаттарың бар эле. Буга чейин жасаган иштериңди биз эч качан унутпайбыз. Кош бол!" - деди Дастан Жумабеков.

Ал эми өкмөт башчы Сапар Исаков маркумдун өзгөчө мекенчилдигин айтты. "Улан бирөөнү басынтпаган, өтө жөнөкөй кичи пейил адам эле. Ал мамлекеттик иш-чараларда болгон күч аракетин жумшачу. Эки жолу өткөн көчмөндөр оюндарында да Уландын салымы чоң болду. Кош бол, Улан!" - деди Исаков.

Чолпонбаевдин сөөгү "Ала-Арча" көрүстөнүнө коюлат.

Эскерте кетсек, 11-ноябрда Жогорку Кеңештин "Республика-Ата Журт" фракциясынан депутат Улан Чолпонбаевдин көз жумганы белгилүү болгон. Алдын ала маалыматтар боюнча, ал боордун циррозу менен ооруган. Депутаттын артында эки кызы калды.