Элүүбай Отунчиев: "Атамбаев эч качан Таласты, элди бөлгөн эмес. Анын Абыке менен Көбөштөр тууралуу айтканы чындык"

Президент Алмазбек Атамбаевдин Таластагы элге айткан сынынын тегерегинде талкуулардын толкуну тыйыла элек. Акын Анатай Өмүрканов ажонун кебин катуу айыптап ыр жазган соӊ Өмүрканов чектен чыгып кеткенин акын Шайлообек Дүйшеев айтып чыккан. Өмүрканов ачууга алдырганын жазуучу Элүүбай Отунчиев дагы белгилейт.

"Эми мен Анатайдын эмне деп жазганын толук окуганым жок. Бирок интернетке абдан терс маанайдагы ыр жазыптыр. Анын бул аракети туура эмес. Анатай оройлук кылган. Канткен менен Алмазбек Атамбаев кыргыз элинин 63 пайызы 6 жылга шайлаган президенти. Ал өз мөөнөтүндө жакшы иштеп, элге мыкты кызмат өтөдү. Анатайды бул аракети үчүн айыптайм. Шайлообек менен да сүйлөштүм. Мен анын пикирин колдойм. Анатайдын жеке өзүнө деле учурдагы президент үй алып берип, китептерин чыгартып берип көп колдоо көрсөткөн экен. Эми Анатайдын бул кылганы адамгерчиликке жатпайт. Эл сыйлаган акын мындай болбойт. Анын ачуу пикирлери чектен чыгып кеткен", - деп билдирди Отунчиев.

Жазуучу президент Алмазбек Атамбаевдин сөзүндө элди бөлүп-жаруу жоктугун, тескерисинче, анда чындыктын үлүшү бар экенин кошумчалады.

"Атамбаев эч качан Таласты, элди бөлгөн эмес. Анын Абыке менен Көбөштөр тууралуу айтканы чындык. Ал "Манастан" үзүндү келтирүү менен элди ынтымакка чакырган. Муну көпчүлүк туура кабыл алууда. Ошол эле кезде коомчулукта, эл арасында ар кандай адамдар бар. Алар сөздү бурмалап жатышат. Хадистерде да башчыңар кул болсо да ага баш ийгиле деп жазылган. Кудайдын буйругу менен, Жараткандын көзү түшкөн адам президент болот. Башчыга баш ийбесек кыргыз туш-тушка бөлүнүп кетпейби. Бөлүнгөндү бөрү жейт дегендей болуп. Атамбаев “кулаалы таптап куш кылдым, курама жыйнап журт кылдым” деген принцип менен иштеди. Андыктан биз биригишибиз, ынтымакты бекемдешибиз керек", - деди Элүүбай Отунчиев.