Президенттик аппарат: "Жээнбековдун инаугурациясына 13 миллион сом жумшалбайт"

Маалымат желесине жаӊы шайланган президент Сооронбай Жээнбековдун инаугурациясына 13,1 миллион сом жумшалары жөнүндө маалымат тараган эле. Бул боюнча бүгүн, 14-ноябрда президенттик аппарат билдирүү жасады.

"Буга чейин маалымдалгандай, президенттик аппараттын башчысы Алмаз Үсөнов башында турган инаугурацияны уюштуруу комитети ишин баштаган. Иш-чаранын чыгымы бекитиле элек, азыркы тапта тийиштүү мекемелер менен макулдашуу процедурасы жүрүүдө. Каржы министри Адылбек Касымалиев 13-ноябрда Жогорку Кеӊеште аталган расмий иш-чараны өткөрүү үчүн бюджетте алдын ала каралган сумманы гана айтты. Президенттин жана өкмөттүн иш башкармалыгынын маалыматы боюнча, бул сумма бир топ аз болот деп күтүлүүдө", - деп айтылат маалыматта.

Бөлүнгөн акча инаугурация өтүүчү имаратты жасалгалоого, транспорт кызматтарына, жабдуулардын ижарасына, президенттин кызматка киришүүсүнө катышкан расмий адамдарды кабыл алууга, концерттик программага, басмакана кызматына жана башка иштерге жумшалары айтылды.