Өлкөдөгү эң аз пенсия алгандар мугалимдер жана дыйкандар экени айтылды

Бүгүн, 15-ноябрда Жогорку Кеңештин жыйынында социалдык фонддун ишмердүүлүгү талкууланды.

Депутат Наталья Никитенко 40 жылдап агартуу жана башка тармактарда эмгектенген жарандар, аз пенсия алып жатышканын айтты. Соцфонддун төрагасы Теңизбек Абжапаров пенсиянын көлөмү жарандардын жүргүзгөн төлөмдөрүнө жараша экенин билдирди.

"Мугалимдер жана башка категориядагы кызматкерлер аз пенсия алышат. 2011-жылга чейин мугалимдер болгону 245 сом эле пенсия алышчу. 2011-жылы мугалимдердин пенсиясын көтөрүү жагы каралып баштаган. Анткени ошол убактан баштап мугалимдердин айлыгы көбөйүп баштаган. Пенсиянын көлөмдөрү алган айлыктарына жараша болот. Биз 40 жылдап иштеп аз пенсия алган жарандар боюнча сунуштарды кабыл алабыз", - деди Абжапаров.

Мындан тышкары аз пенсия алгандардын негизги бөлүгү дыйкандар экени айтылды.

"Дыйкандардын бир айлык төлөмү айына 5 сомду гана түзүп жатат. Ошондуктан дыйкандардын пенсиялары аз болуп жатат. Азыр дыйкандар 1700 сом менен пенсияга чыгат", - деп кошумчалады Абжапаров.