Ат-Башыда өндүрүлгөн сыр Орусиядагы азык-түлүк жарманкесинде мыкты деп табылды

Орусиянын Новосибирск шаарында өткөн азык-түлүк жарманкесинде Ат-Башы районунда өндүрүлгөн сыр эң мыкты деп табылды. Бул тууралуу маалыматты SUPER.KG порталына ата мекендик өндүрүш ассоциациясынын төрагасы Бакыт Дегенбаев билдирди.

Маалыматка ылайык, Орусиянын Новосибирск шаарында 8-ноябрда башталган "Интерфуд Сибирь 2017" азык-түлүк жарманкесинде Ат-башы районунда өндүрүлгөн сыр калыстар тобунун "Жарманкенин алтын медалы" аттуу сыйлыгына татып, эң мыкты сыр аталды.

"Ат-Башыда өндүрүлгөн балдын артынан эми минтип сыр дагы эң жогорку баага татыды", - деп билдирди Дегенбаев.

Белгилүү болгондой, "Интерфуд Сибирь 2017" жарманкесине Кыргыз өлкөсүнөн 9 азык-түлүк өндүрүүчү ишкана катышкан.

"InterFood Siberia 2017" жарманкеси Орусиядагы эң ири эл аралык азык-түлүк жарманкелеринин бири болуп эсептелет. Бул жарманкеге катышкан өндүрүүчүлөр аз убакыт ичинде өнөктөштөрдү жана товар сатып алуучуларды таба алышат.