Дүйнө чемпиондугуна өтпөй калган Италия курамасынын башкы машыктыруучусу кызматынан бошотулду

Футбол боюнча 2018-жылы Орусияда өтүүчү Дүйнө чемпиондугуна катыша албай калган Италия курама командасынын башкы машыктыруучусу Жампьеро Вентура кызматынан бошотулду. Бул тууралуу чет элдик басылмалар жазып чыгышты.

Маалыматка ылайык, Италия курама командасы Дүйнө чемпиондугуна жолдомо алуу үчүн беттеште Швеция курамасына жеңилип калган соң, Италиянын футбол федерациясы Жанпьеро Вентураны команданын башкы машыктыруучу кызматынан бошотту.

Эске салсак, Италия-Швеция беттеши эки оюндун жыйынтыгы боюнча 0:1 эсебинде Швециянын жеңиши менен аяктаган. Муну менен Дүйнө чемпиондугунун 4 жолку жеңүүчүсү - Италия курамасы 1958-жылдан бери биринчи жолу Дүйнө чемпиондугуна катышууга жолдомо ута албай калган.

Маалымдай кетсек, Дүйнө чемпиондугу 2018-жылдын 14-июнь, 15-июль аралыгында Орусиянын 11 шаарында жайгашкан 12 оюн талаасында өтмөкчү. Учурда чемпиондукка 31 курама команда жолдомо алышты, бүгүн, 16-ноябрда акыркы жолдомону Жаңы Зеландия менен Перунун курама командалары талашмакчы.