Саматбек Тойматов, врач: "Көптөгөн антибиотиктер бактерияларга таасир эте албай калды, адам алсыз эле инфекциядан каза болуп калышы мүмкүн"

Акыркы 20 жылдын ичинде көптөгөн антибиотиктер бактерияларга таасир этпей калды. Бул коомго жаӊы коркунуч жаратканын 15-ноябрда Бишкекте өткөн тегерек столдо Саламаттыкты сактоо министрлигинин Медициналык жардам көрсөтүү жана дары саясаты башкармалыгынын жетекчиси Саматбек Тойматов билдирди.

"Антибиотиктер медицинадагы эң улуу ачылыштардын бири. Мисалы, жалгыз пенициллин гана жүз миллиондогон адамдардын өмүрүн сактап калды жана сактап жатат. Бирок, тилекке каршы, акыркы 20 жылда көптөгөн антибиотиктер таасир этүүдөн калды, башкача айтканда, бактериялар антибиотиктерди сезбей калды. Бул адам алсыз эле инфекциядан каза болуп калышы мүмкүн дегенди билдирет. Биз эффекти аз антибиотиктерди көзөмөлдөн тыш колдонуу менен өзүбүздүн ден соолугубузду гана жоготпой, өлкө экономикасына да зыян келтирип жатабыз", - деди Тойматов.