Депутаттар мектептердин курулушунун сапатына көңүл бурулбай жатканын айтышты

Бүгүн, 16-ноябрда Жогорку Кеңештин жыйынында депутаттар мектептердин курулушунун сапатына көңүл бурулбай жатканын айтышты.

Депутат Камчыбек Жолдошбаев курулуп жаткан мектептердин сапаты начар болуп жатканына өзү күбө болгонун билдирди. Анын айтымында, Нарын районунун Эчки-Башы айылындагы мектептин курулушунун сапатына көңүл бурулбай жатат.

КСДП фракциясынан депутат Улан Примов Жолдошбаевдин сөзүн колдоду. “20 миллион сомго курула турган мектептин тендеринде 10 миллион сом сунуштаган компания утуп алып жаткан көрүнүштөр бар. Мындай учурда кайдагы сапатты айта алабыз. Мектеп курулушунда сапатка өтө чоң көңүл буруу керек болуп жатат”, - деди Примов.

Ал эми “Бир Бол” фракциясынан депутат Бакирдин Субанбеков ички миграциянын күчөшү менен мектептерде бир партада 3төн окуучу окуп жатканын белгиледи.

Учурда парламентте өлкөнүн мектепке чейинки билим берүүчү жана жалпы билим берүүчү уюмдарынын имараттарынын курулушунун жүрүшүнө арналган өкмөттүк саат өтүп жатат.