Бишкекте "Жибек жолундагы пекиндик жомок" аттуу сүрөт көргөзмө ачылды

Бүгүн, 16-ноябрда Бишкек шаарындагы Чуйков атындагы эмен сейил багында, Кыргыздын сүрөтчүлөр бирикмесинин 83 жылдыгына карата "Жибек жолундагы пекиндик жомок" аттуу сүрөт көргөзмө ачылды.

Көргөзмөдө Кытайдан келген сүрөтчүлөрдүн жибекке тартылган эмгектери коюлду. Кыргыз сүрөтчүлөр бирикмесинин төрагасы Таалайбек Усубалиев иш-чара тууралуу буларга токтолду.

"1934-жылы 16-ноябрда Кыргыз сүрөтчүлөр бирикмеси уюшулган. Бул белгилүү күнгө карата бүгүн кытайлык кесиптештерибиз "Жибек жолу" аттуу көргөзмөнү ачып жатышат. Биздин бирикмеге быйыл 83 жыл болгонуна байланыштуу биз кытайлык сүрөтчүлөрдү чакырдык. Кытайда жибекке сүрөт тартуу искусствосу өнүккөн. Чет элдик коноктор бизге жибекке сүрөт тартуу өнөрүн үйрөтүшөт. Алар сүрөт тартууда май боёк колдонушпайт. Көргөзмөгө 6 сүрөтчүнүн 20дан ашуун сүрөттөрү коюлган", - дейт Таалайбек Усубалиев.