Тышкы иштер министри казак кесиптешине жооп кайтарды

Кыргыз Республикасынын тышкы иштер министри Эрлан Абдылдаев Казакстандын тышкы иштер министри Кайрат Абдрахмановдун айтканына жооп берди. Абдылдаевдин билдирүүсүндө "менимче, Казак тышкы иштер министри билдирүүсүндө өзүнө каршы сүйлөдү. Эгер ал өз сөздөрүнөн кийин "Дипломат жана Казак тышкы иштер министри катары башка мамлекет башчысынын сөзүнө баа бере албайм" деп койсо маселе бүтмөк. Башка бир саясий серепчинин оюна кошулуп же кубаттаганы ал тараптан туура эмес болуп калды. Андыктан ал өзүнө карама-каршы чыгууда" деп айтылат.

Буга чейин президент Алмазбек Атамбаевдин 15-ноябрдагы билдирүүсүнө карата Казакстандын тышкы иштер министри Кайрат Абдрахманов өз пикирин билдирген. Чиновник "Кыргыз президентинин билдирүүсү орунсуз жана эгемендүү өлкөнүн башчысынын статусуна ылайык келбей турганын айткан белгилүү саясат таануучунун пикирине кошулам" деген.

Эскерте кетсек, Алмазбек Атамбаев 15-ноябрда Кыргыз мамлекетинин ЕАЭБдеги укуктары Казакстандын өзүм билемдигинин айынан чектелип жатканын айткан. Ошондой эле президент Нурсултан Назарбаевдин дарегине сын-пикир билдирген.