Владимир Путин муз үстүндөгү бий боюнча Дүйнөнүн эки жолку чемпиону Евгения Медведеваны 18 жашка толушу менен куттуктады

Орусиянын президенти Владимир Путин муз үстүндөгү бий боюнча Дүйнөнүн жана Европанын эки жолку чемпиону Евгения Медведеваны туулган күнү менен куттуктады. Чет элдик маалымат булактары жазгандай, ал кечээ, 19-ноябрда 18 жашка толгон.

"Урматтуу Евгения Армановна! Менин куттуктоомду кабыл алыңыз. Таланттуу, максатка жете билген жана өтө эмгекчил адамсыз. Сиз эл аралык деңгээлдеги мелдештерде эң мыкты ийгиликтерди жаратып, муз үстүндө бийлөөнүн миллиондогон сүйүүчүлөрүнүн кумирине айландыңыз. Алдыга койгон пландарыңыздын аткарылышына тилектешмин жана бардык жакшылыктарды каалайм", - деп жазылат Путиндин куттуктоосунда.

Евгения Медведева - муз үстүндөгү бий боюнча дүйнөдөгү эң жаш спортчулардын катарын толуктайт. Мекендештери 2018-жылы өтө турган кышкы Олимпиадалык оюндардан аны алтын медаль алат деп күтүшүүдө. Акыркы эки жыл ичинде Евгения көптөгөн дүйнөлүк мелдештерге катышып бир да жолу жеңилген эмес.