Кыргыз тарап Кыргыз-Казак чек арасындагы кырдаал боюнча БУУда баяндама жасады

Кыргыздын БУУдагы өкүлчүлүгү уюмга мүчө мамлекеттерге Кыргыз-Казак чек арасындагы кырдаал боюнча маалымат берди. Бул тууралуу 21-ноябрда Тышкы иштер министрлигинин маалымат кызматы билдирди.

17-ноябрда БУУнун Башкы ассамблеясынын алкагында өткөн жыйында экономикалык, экологиялык жана каржылык маселелерге тийиштүү резолюциялардын топтому каралган. "Бир тараптуу экономикалык чаралар - өнүгүп келе жаткан өлкөлөрдөгү саясий жана экономикалык мажбурлоо каражаты" деген резолюция талкууланганда Кыргыздын уюмдагы туруктуу өкүлү Миргүл Молдоисаева билдирүү жасап, Казакстан 1,5 айдан бери Кыргыз-Казак чек арасында адамдардын, товар жана транспорт каражаттарынын эркин кыймылына жасалма тоскоолдуктарды жаратып жатканын айтты.

Кыргызга зыян келтирүү максатында Казакстан тараптан экономикалык жана транспорттук блокада колдонулуп жатканын белгиледи.