Өкмөт жооп берет: Айдоочулук күбөлүгүмдө жарактуу мөөнөтү көрсөтүлбөгөндүктөн Орусияда айып пул төлөп жатам. Айдоочулук күбөлүгүмдү кантип алмаштырам?

Урматтуу колдонуучу, сизде өкмөткө, ага тиешелүү министрликтерге берилүүчү суроолор жана чечилбеген маселелер барбы? Анда «Суперстандагы» «Өкмөт жооп берет» бөлүмүнө суроолоруңузду калтырыңыз. Суроолоруңузга тиешелүү тармактардын адистеринен жооп алып берүүгө даярбыз.

Окурманыбыздын “Соңку кабар” бөлүмүнө калтырган суроосу: “Менин айдоочулук күбөлүгүмдө жарактуу мөөнөтү көрсөтүлгөн эмес. Азыркы тапта Москва шаарындамын. Айдоочулук күбөлүгүмдү кантип алмаштырсам болот? Мага окшоп жол коопсуздук кызматкерлерине түшүп, айдоочулук күбөлүгүндө жарактуу мөөнөтү жок болгондугуна байланыштуу айып төлөгөн мекендештерибиз чет өлкөлөрдө толтура. Бул маселе боюнча бирөө-жарым жоопкерчилик алабы? Эмне үчүн мурда айдоочулук күбөлүктү жарактуу мөөнөтүн жазбай таратышкан? Суроомду тиешелүү кызматтагыларга жеткирип коюшуңуздарды өтүнөм. Кантип эми биз айдоочулук күбөлүгүбүздү алмаштырабыз?”

Жооп: “Мурда жарактуу мөөнөтү көрсөтүлбөгөн айдоочулук күбөлүктөр берилгендиги чындык. Бирок ал айдоочулук күбөлүктөрдүн жарактуу мөөнөтү жазылбаганы менен мыйзам боюнча 10 жылга жарактуу экендиги баарына маалым болчу. Былтыркы жылдан баштап эл аралык нормаларга жооп берсин деп айдоочулук күбөлүктөргө жарактуу мөөнөтү жазыла баштады. Орусияда иштеп жатышкан көптөгөн мекендештерибиз келип айдоочулук күбөлүктөрүн алмаштырып кетишти. Жогорудагы суроо узаткан мекендешибиз да келип, айдоочулук күбөлүгүн алмаштырып кетсе болот. Ал эми айдоочулук күбөлүктө жарактуу мөөнөтү көрсөтүлбөгөндүгүнө байланыштуу айып салуу туура эмес, болушу мүмкүн да эмес.Себеби бул маселе 2 өлкөнүн өкмөтү тарабынан чечилген. Балким, башка эреже бузуулар боюнча айып салынышы мүмкүн же ошол чет өлкөлүк жол коопсуздук кызматкерлеринин кызматтык абалын кыянаттык менен пайдалануусу деп эсептесек болот”.

Суроого Кыргыз Республикасынын Өкмөтүнө караштуу Мамлекеттик каттоо кызматынын Транспорттук каражаттарды каттоо жана айдоочулар курамы департаментинин көзөмөлдөө бөлүмүнүн башкы адиси Адылбек Рыскелдиев жооп берди.

Эгер сизде да суроолор болсо, анда "Өкмөт жооп берет" бөлүмүнө кириңиз.