Текебаев менен Чотоновдун жактоочулары Эл аралык сотко кайрылышат

Бүгүн, 21-ноябрда Жогорку Сот "Ата Мекендин" абактагы лидери Өмүрбек Текебаев менен экс-министр Дүйшөнкул Чотоновдун иши боюнча алардын жактоочуларынын көзөмөл арызын карап, Биринчи Май райондук жана Бишкек шаардык соттун чечимдерин күчүндө калтырды. Жактоочулардын бири Канат Хасанов иш материалдарды карап чыгып, жаңы жагдайлар боюнча Эл аралык сотторго кайрыла турганын билдиришти.

"Биз төмөнкү инстанциядагы соттордун өкүмү далилсиз экенин жүйө келтирип бердик. Бирок Жогорку Сот чечимди күчүндө калтырып койду. Эми иш материалдарды кайрадан карап чыгып, жаңы жагдайлар боюнча Эл аралык сотторго кайрылабыз", - деди Хасанов.

Жогорку Сот өкүмдү күчүндө калтырганы менен мунапыстын негиздемесин өзгөртүп, мазмунун ошол бойдон калтырды. Тактап айтканда, өкүмдөгү "2014-жылдын 27-январындагы чыккан “Адам укуктарынын жалпыга таанылган декларациясынын 65 жылдыгына мунапыс жөнүндө мыйзамы" деген сөздөр "2011-жылдын 19-июлундагы “Кыргыз Республикасынын көз карандысыздыгынын 20 жылдыгына байланыштуу мунапыс жөнүндө” деп алмаштырылды.

Райондук соттун өкүмүндө алардын жаза мөөнөтү мунапыс боюнча үчтөн бири кыскартылган. Тергөө абагындагы өтөгөн жаза мөөнөтү эки күндөн эсептелип, кыскартылган жаза мөөнөтү 4,5 жылды түзөт.

Эске салсак, 16-августта райондук сот тарабынан Текебаев жана Чотонов күчөтүлгөн режимде 8 жылга эркинен ажыратылган. Ошондой эле мүлктөрү конфискацияланып, абактан чыккандан кийин 3 жыл мамлекеттик кызматта иштөөсүнө тыюу салуу каралган.

2-октябрда Бишкек шаардык соту райондук соттун чечимин күчүндө калтырган.