Казактын белгилүү продюсери Баян Максат кызы айымдардын укугун коргоого багытталган фонд түзөт

Казактын белгилүү продюсери Баян Максат кызы айымдардын укугун коргоого багытталган фонд түзүү алдында турат. Бул тууралуу ал казак телеканалдарынын бирине берген маеги учурунда айткан.

Маалым болгондой, аэропорт, кафе, дүкөн жана башка жерлерден продюсерди көргөн айымдар андан жардам сурап көп кайрылышат. Мындан улам ал аялзатынын укугун коргоо үчүн атайын фонд түзүп, жакында үй-бүлөлүк запкыга кабылган каармандардын бири менен жыйын өткөрүүнү пландап жатканын айткан.

"Мындан ары бизге кайрылган аялзатынын баарына жардам берүүгө аракет кылабыз. Долбоорду ишке ашыруу үчүн активдүү иштеп жатабыз. Тажрыйба топтоо максатында чет өлкөгө да чыгып келсемби деп ойлонуудамын. Азыр каражат жагы бир аз көйгөй жаратууда. Анткени сатылган китептеримдин акчасы фонд түзүүгө жетпейт экен", - деген ал.

Белгилүү болгондой, фонд "Аю тас" деп аталат, ал байыркы түрк тилинен которгондо "үй-бүлө" дегенди түшүндүрөт.

Эскерте кетсек, былтыр продюсердин мурунку жолдошу Бахыт Есентаев жубайын ур-тепкиге алып, бычак сайып жиберген.