Орусиядан бериле турган 127 миллион долларга лаборатория курулат

Жогорку Кеӊеште Кыргыз өкмөтү менен Орус өкмөтүнүн ортосундагы ЕАЭБ алкагында Кыргыз өлкөсүнө техникалык көмөк көрсөтүү жөнүндө макулдашууга өзгөртүүлөр менен толуктоолорду киргизүү боюнча протоколду ратификациялоо тууралуу мыйзам долбоору каралып, үчүнчү окууда добуш берүүгө жөнөтүлдү.

Талкуу жүрүшүндө депутат Жанар Акаев Орусия тараптан бөлүнгөн каражаттардын пайдаланылышына кызыкты.

Бажы кызматынын төрагасы Азамат Сулаймановдун айтымында, 127 миллион доллар лаборатория курууга жумшалып жатат. "Мындан тышкары 14 миллион долларга керектүү жабдуулар алынды, 36 миллион куруу жана долбоордук иштерге жумшалмакчы. Учурда грант берүүчү компания менен сүйлөшүүлөр макулдашуулар жүргүзүлүүдө", - деди Сулайманов.

Депутаттар кыргыз тараптын ЕАЭБ курамына кирүүдөгү жеӊилдетилген мөөнөттү эмне үчүн дагы 2 жылга узартпай калганына кызыгышты. Каржы министринин орун басары Мирлан Байгончоков ушул протокол аркылуу жеӊилдетилген мөөнөт 2018-жылга чейин узартылып жатканын билдирди. Бул мыйзам долбоору ратификацияланса, келишим мөөнөтү узартылат.