ЖЫЛНААМА, 22-НОЯБРЬ: Корейлердин Таттыбүбүсү... Сулуулуктун символуна айланган актриса Соң Хе Кйо 36 жашка толду

Корей сериалдарынын классикасы болуп калган “Күз жомогу” жана “Ва банктан” старт алган атактуулук... Арадан 15 жыл өткөндөн кийин да популярдуулугун жоготпой, бир канча өлкөлөрдө рейтинг жараткан “Күндүн мураскерлери” дорамасы... Андан тапкан махабат... Мунун баары бүгүн туулган күнүн белгилеп жаткан Соң Хе Кйо тууралуу.
1981-жылы төрөлгөн актриса карьерасын кино талаасынан эмес, моделдиктен баштаган. “Көздүү мончок жерде калбайт” демекчи, сынактан көзгө илинген өспүрүм кызды 1996-жылы “Бактылуу таң” деген сериалга тартылууга чакырышкан. Бирок ал корей сериалдарынын сүйүүчүлөрүнө 2000-жылы жарыкка чыккан “Күз жомогу” аркылуу гана таанылат.
Ал эми 2002-жылы тартылган кумар оюндары жөнүндөгү “Ва-Банк” сериалынан кийин Соң Хе Кйонун сүймөнчүк катары статусу биротоло бекемделип, атагы ого бетер артат.
2004-жылы эл алдына тартууланган “Жылуу уя” сериалында актриса көрөрмандарын комедиялык образы менен кубанта алган. Ушул жерден айта кетүү керек, дээрлик бардык тартылган сериалдарынан кийин сулуу атактууга байланыштуу ушак сөздөр жаңыланып турган.
Ал эми соңку тартылган сериалдарына келсек, анда 2013-жылы чыккан "Ушул кышта шамал согот" дорамасын белгилөөгө арзыйт. Анда актриса Чо Ин Сон менен башкы каармандардын бирин эсте каларлык ойногон.
Соң Хе Кйо ушул жылдын 31-октябрь күнү актёр Соң Жуң Киге турмушка чыкты. Ал жолдошу менен "Күндүн мураскерлери" сериалына чогуу тартылып, табышып калышкан. Актриса күйөөсүнөн 4 жашка улуу.
Учурда Соң Хе Кйо тасмаларга тартылгандан тышкары жарнамалык роликтерге жана фотосессияларга көп чакыруу алган эң белгилүү корей жылдыздарынын сап башында.
2010-жылы декабрда европалык “BAZAAR” мода журналынын “Дүйнөнүн 100 эң сулуу айымы” деген тизмесинде Соң Хе Кйо 18-орунду ээлеген, ал эми азиялык атактуулардын ичинен 1-орунду илип кеткен.
22-ноябрдын жылнаамасы.